TACLOBAN CITY – Destinasyon utro yana han pioneering Australian Cruise Line an probinsiya han Biliran kun diin, dara nira ha ira pagbalik ha Sinirangan Bisayas an bag-o nga cruise ship nga “The Coral Geographer” nga nagtikang nga magpalawud dida han tuig 2021.
Parehas han ruta han malinampuson nga pagbisita han “The Coral Adventurer” han nakalabay nga tuig, in bibisitahon gihapon han bag-o nga cruiseship an mga lugar ha Biliran.
Una nga ginbisita hini an bag-o nga lugar nga ginapi ha travel itinerary han barko, an Isla han Higatangan han Naval dida han Oktubre 31.
Durante han ira pagbisita ha probinsiya han Biliran mae-eksperyensiyahan han mga turista an magkadurudilain nga aktibidad sugad nala hiton snorkeling, swimming, ngan pagtilaw ha mga lokal nga pagkaon nga nagpapakita han identidad han mao nga probinsiya.
Sumala kan Maripipi, Biliran Municipal Mayor Joseph Canonoy Caingcoy nga nakatalaan naman nga bumisita han mao nga cruiseship an lugar han Maripipi ngan Sambawan nga kilala ha ira maghusay nga yamang lupa ngan yamang dagat yana nga maabot nga Nobyembre 4.
Sumala pa hini nga andam na an ira lokal nga pangobyernuhan ha pagtapo han turista nga sakay han The Coral Geographer sugad nala hiton mga aktibidades nga pagbubuhaton han mga ini ngan an mahugot nga seguridad agud magpabilin ngan mamentenar an kahimyang ngan waray mahipatik nga mga insidente han pagbisita han mga turista.
Samtang, panuyuan naman han mao nga pagbisita in agud ipakita gihapon ha mga turista an magkadurudilain nga tradisyon, kultura, ngan kinabuhi han mga munisipalidad ha Biliran ngan maparibhong an pagkilala ha mao nga lugar.
Dugang pa ni Mayor Caingcoy nga bisan man nga usa ha pinaka gutiay nga probinsiya an Biliran, in riko naman ini ha natural nga kahusay ngan mala-kultura nga eksperyensiya kun diin, masisiring nga ini in an maupay nga destinasyon para ha mga turista nga mahilig ha adventure ngan authentic local encounters.
An inklusyon han probinsiya ha intinerary han mao nga Cruise Line in nagpapakita ha nagtitika ribhong naman nga reputasyon han Biliran nga “must-visit spot” ha Sinirangan Bisayas.
