TACLOBAN CITY – Ginpahayag han Bureau of Fisheries and Aquatic Resources BFAR-8, nga mag angan-angan an publiko partikular adton waray mahilakip yana han panhatag hin fuel subsidy card para ha mga parupangisda ha rehiyon, matungod nga naghihimo na hira hin pamaagi agud nga magkamayda hin 2nd tranche an mao nga subsidiya.
Sumala kan Christine Gresola, Information Officer han BFAR-8, nga siguraduhon la liwat han mga karuyag nga mahilakip ha 2nd tranche nga fuel subsidy ngan han bisan anu nga klase hiton programa han ira buhatan, nga mga rehistrado an mga ine nga parupangisda.
Dugang pa han nasabi nga opisyal, damo mangud an mga nagpapadara ha ira hin mensahe pinaagi ha ira facebook page, nga mga nagrereklamo matungod nga dire an mga ine nahilakip ha syahan nga tranche han panhatag han fuel subsidy card para ha mga parupangisda ha sisnirangan bisayas.
Ginmalatumat pa ni Gresola, nga naiintindihan nira an pag-araba han mga waray kahilakip nga parupangisda matungod nga limitado la an mga benespisyaryo nga makaka-tagamtam han nasabi nga programa.
