Nagpahimatngun hi Grains Retailers Confederation Eastern Visayas President, Frederick Dy ha posible nga epekto han pagkadelatar ha pagtanom han mga humay ha Sinirangan Bisayas kun diin, posible ini magresulta ha hamubo nga harvest ngan paghitaas han presyo han bugas ha mga masunod nga bulan.
Basar ha Department of Agriculture ha Eastern Visayas, nga an rason han pagkadelatar han pananom han humay yana nga tuig in mahitungod han re-scheduling hini. Ini in mahitungod nga kahuhuman pa la an harvest season dida han mga nakalabay nga bulan ngan kinahanglan papahuwayon laanay an tuna ngan magbuhat hin land preparation partikular na an mga rice-producing areas han rehiyon.
Sumala naman kan Dy, nga waray problema iton pagkakadelatar han farming schedule kun supresyente iton suplay han mga gin-angkat nga bugas ha bug-os nga nasud. Dako gihapon iton magigin problema han masukot nga importasyon ha pamresyuhan hiton bugas ha mga merkado pagtika-iha, kun madepender la iton nasud dinhi.
Dugang pa ni Dy nga kaupod ha mga rason han pagkadelatar in an hataas nga product ngan transportation costs mahitungod han krisis ha lana, panahon ngan adjustment han mga parag-uma ha insakto nga planting window agud malikayan an mas dako nga damage tikang ha pabag-o bag-o nga klima.
Nanawagan naman hi Dy ha nasyunal nga pangobyernuhan nga pakusgon pa an suporta ha mga parag-uma, kaupod na an masukot nga pagpapatubig ngan maupay nga irigasyon ha mga umhanan, dayon nga distribusyon han farm inputs, ngan mga programa agud maibanan an epekto han mga pagkakadelatar ha produksyon han bugas.
Samtang, waray naman may nakikita nga dako nga pag-umento ha pamresyuhan han bugas ha bug-os nga rehiyon.
