Usa nga kakaiba nga kakarit ha sport ngan knitting an igin parayaw han marathon runner nga hi Simon Fannon tikang ha United Kingdom mahuman niya madukdok an Guinness World Record ha London Marathon di pala maiha.
Nakuha niya an opisyal nga titulo para ha “longest scarf knitted while running a marathon” mahuman hiya makabug-os hin usa nga makulay nga scarf nga mayda kahilaba nga 5.59 meters o kaparehas han sukol han usa nga giraffe.
Nahuna-hunaan ni Simon nga prubaran an kakaiba nga ayat agud igduso ha publiko an sining han paggantsilyo para ha mga kalalakin-an. Pinaagi han iya Instagram account, aktibo niya nga gin aaghat an mga kalalakin-an nga himuon nga libangan an paggantsilyo para ha pag-atiman han ira mental health.
Ginamit gihapon han anay Royal Marine an higayon agud makatirok hin pondo para ha Huntington’s Disease Association ngan ha ReOrg Charity.
Labot pa ha kakaiba nga kahilaba han nahimo nga scarf, malinangpuson gihapon nga nahuman ni Simon an bug-os nga marathon ha sulod han nakakabilin nga oras nga 5 hours, 48 minutes, ngan 8 seconds.
