TACLOBAN CITY – Maupay nga Sumat!
Abilabe yana nga adlaw, Setyembre 13, an Benteng Bigas Meron Na o BBM Rice ha Plaza Rizal ha presyo nga P20 kada kilo.
Ine an iginpahibaro ni Tacloban City Agriculture’s Office Head, Romelo Anade.
Pwede naman makapalit hin maximum hin 10 kakilo an mga residente, pero kinahanglan nga residente han Tacloban an mapalit.
Ginpahibaro gihapon ni Anade nga waray pili ha kun hin-o an makakapalit han nasabi nga bugas mahitungod nga Rice for All ine.
Magtitikang naman an pagbaligya niyan nga alas-8 yana nga aga kutob alas-5 hiton kulop o ngada hiton kaubos la an suplay.
Nagpahimatngon naman ine ha mga mamaralit nga dire magpaduso-duso ha pila ngan dire maguna-unahay mahitungod nga papaningkamutan nira nga makapalit an ngatanan.
Samtang, dire naman libre an surudlan o plastik han bugas; ginbabaydan ine hin P10, pero pwede gihapon magdara hin kalugaringon nga surudlan kun dire karuyag magbayad.
