TACLOBAN CITY – Patay an usa nga Barangay Treasurer ha Villaba, Leyte mahuman nga pagpamusilon ine han waray pa kakikilal-e nga mga suspek, samtang samaran naman an kaupod hine.
Ginkilala an namatay nga biktima kan Mateo Rasonable 41-anyos an pangidayon, may live- in partner, usa nga Barangay Treasurer, ngan residente han Barangay Mataloto Leyte, Leyte, ngan nag-angkon naman hin mga samad hi Angielyn Gulanie, 54-anyos an pangidaron, ngan residente han Barangay Mataloto, Leyte, Leyte.
Sumala kan PMAJ. Edwin Tolibas, Chief of Police hiton Villaba Municipal Police Station, nahitabo an pamusil mga banda alas-2:30 han nakalabay nga adlaw ha Brgy. Cabungahan, Villaba, Leyte kun diin tikang an mga biktima ha LandBank-Carigara han pagpamusilon an mga ine pag abot ha nasabi nga lugar.
Basar ha inisyal nga imbestigasyon, gintambangan an mga biktima hin tulo nga waray pa pangilal-an nga mga suspek kun diin pag abot han mga biktima ha nasabi nga lugar in tigda an mga ine gin paarakan hin buto hin pusil kun diin dayun naman daw nga naigo hi Rasonable rason han iya dayun nga pagkamatay, samtang naigo naman ha braso an upod hine nga hi Gulanie.
Dayun naman nga kumalagiw an mga suspek gamit an duha nga single motorcycle tipakadto ha area han Barangay Calbugos,Villaba Leyte.
Waray naman daw kabablayan nga makikit-an ha lugar han insidente mahitungod nga 1-2 kakilometros an kaharayo hine tikang ha highway.
Nakuha naman ha lugar an insidente an walo nga basiyo han calibre .45 ngan usa nga fired bullet tikang ha calibre .45 gihapon.
Ha pagkayana in padayun pa naman an gindudumara nga imbestigasyon hiton mga otoridada agud mahibaruan an motibo han mga suspek.
