METRO MANILA – Gin-aprubaran na han Senado ha ikatulo ngan urhi nga pagbasa an Senate Bill No. 1629 o an Multi-Faith Prayer and Quiet Rooms Act, nga may panuyuan igduso an inklusibo nga lugar para ha magkaduro-dilain nga pagtuo ha mga pampubliko nga lugar.
An balaudnon in ginduso ni Sen. Mark Villar, nga nagmamando ha pagtukod han mga multi-faith prayer ngan quiet rooms ha mga ahensiya han gobyerno ngan pili nga pampubliko nga establisyemento ha nasud.
Subay kan Villar, usa ine nga importante nga pitad agud kilal-on nga ig-respeto an magkadiru-dilain nga espiritwal nga pagtuo han mga Pilipino.
Napapanahon gihapon an pag-sumite hine labi na panahon han Ramadan, diin mas ginpahugot an pag-ampo ngan debosyon han mga Muslim.
Ha mga deliberasyon, pinahaluag an orihinal nga panuyuan han balaudnon nga naka-pokus la ha Muslim prayer spaces agud magin abre ha ngatanan nga relihiyon.
Pinangunahan ine ni Senate Committee on Muslim Affairs Chair Robin Padilla.
Ha ilarom pa han balaudnon, igtutukod an mga prayer ngan quiet rooms ha mga lugar sugad han opisina han gobyerno, airport, ospital, ngan pantalan.
Ine an magsisirbe nga neutral space para ha pag-ampo, meditation, pagninilay, ngan dire mapabor ha anuman nga relihiyon.
Subay ha mga manbaralaod, makakabulig an balaudnon ha pagpapakusog han pag-respeto ngan pagkakaintindihay ha butnga han magkadiru-dilain nga relihiyon ha nasud.
