TACLOBAN CITY – “Mas makusog pa ha dalugdog!” Ini an ginpahayag ni Milarosa Verzosa, Bombo International News Correspondent ha Beruit, Lebanon kahuman an pagbul-iw han mga eroplano nga pangyera hin mga pabuto partikular na ha South Lebanon ha butnga hiton nagtitika-grabe nga tensiyon.
Sumala kan Versoza nga bisan man harayo iton iya ginkakabutangan ha sentro han kasamok ha Lebanon in nababati-an lagihapon nira iton mga pagbuto ngan nakikit-an gihapon nira iton mga nanga-ngagi nga mga fighter jets ngan war plane.
Dugang pa hini nga ha pagkayana in ginpalusad na iton alert level 3 ha magkadurudilain nga lugar ha Lebanon matungod han kasamok nga natatabo ha butnga hiton Hezbollah ngan Israel kun diin, boluntaryo an pag-repatriate o kun panguli ha Pilipinas hiton mga OFWs sugad man iton mga Pilipino nga nangungukoy ha Lebanon.
Ginmalatumat naman ni Versoza nga may plano na gihapon hiya magrepatriate mahitungod nga bangin dumuroy pa iton kasamok nga natatabo.
Manunumduman nga ginpahimatngun han Department of Foreign Affairs nga mag-evacuate na an nga Pinoy ha mga talwas nga lugar ha Lebanon o kun mahihimo in magrepatriate na an mga ini, kun diin, andam naman an mao nga ahensiya para buligan iton mga Pilipino nga mauli ha Pilipinas.
