Ginklaro ni Batangas Rep. Gerville “Jinky Bitrics” Luistro nga magseserbi nga preliminary investigation ngan dire pa usa nga trial an nakatalaan nga hearing han House Committee on Justice ha Marso 25, 2026 kasumpay han impeachment complaint kontra kan Vice President Sara Duterte.
Mahitungod hini, limitado la an partisipasyon han mga abogado ngan mga magbabalaod nga dire membro han komite ha pagbubuhaton nga pamakiana ha mga testigo.
Sumala kan Justice panel Chair Luistro, an mga membro la han Committee on Justice an mayda kapas magdumara hin direct ngan cross-examination basar ha mga aludayday han 20th Congress.
An mga abogado han magkaluyo nga parte in pwede la magserbi nga “taga-payo” ha iya mga kliyente, samtang an mga magbabalaod nga dire membro han komite, sugad kan Rep. Rodante Marcoleta, in kutob “manifestation” la an pwede himuon ngan dire pwede mag-pakiana ha mga testigos.
Igin eksplikar pa han magbabalaod nga an papel han Kamara in kaparehas han mga prosecutor nga nag-iimbestiga kun may-ada “probable cause” agud igpadayon an kaso.
Kun mapapamatud-an an basaranan, igrerekomenda ini ha plenaryo kun diin kinahanglan an botos nga 1/3 han ngatanan han membro han Kamara agud pormal nga maipadara an Articles of Impeachment ha Senado para ha aktwal nga pagdungog.
