TACLOBAN CITY — Andam na an Barangay 94 Basper Tacloban City ha pagdagsa han mga tawo ha North Cemetery yana nga pagsaurog han Undas 2026.
Sumala kan Hon. Claro Francisco, konsehal han nasabi nga barangay, nagkamay-ada na hira hin meeting para paghisgotan an mga pangandaman ha Undas. Samtang, ha ira pagbisita ha North Cemetery, may-ada hira nakit-an nga pipira nga problema, pero sumala ha iya, masusolusyonan ini pinaagi han City Health Office.
Usa nga problema amo an mga tul-an han patay nga nahibilin nga gingawas tikang ha lubnganan bisan waray permiso tikang ha mga paryente han mga namatay. Sumala ha mga caretaker, kon umabot na hin napulo ka tuig, igbabalhin na ini ha mga bone box bisan kon waray na permiso tikang ha pamilya. Tungod kay damu na an nakabutang nga tul-an ha mga bone box an iba nga tul-an in nahibilin na la ha gawas ngan an iba in nakasulod ha itom nga cellophane.
Ginpahayag ni Francisco nga panuyo nira masigurado an katalwasan han publiko, labi na nga bangin magin hinungdan ini hin sakit kon diri maataman hin maupay.
Ginpahayag ni Francisco nga diri hira nababaraka bisan kun magdamu an mga tawo nga mabisita ha sementeryo tungod may-ada hira mga force multiplier nga mabulig ha pagmintinar han kahapsay ngan seguridad, pareho han Philippine National Police (PNP), Tacloban City Traffic Operations Management Office (TOMECO), ngan Public Assistance for Rescue, Disaster and Support Services (PARDSS). Dugang pa niya, may-ada mga medical practitioner nga naka-standby ngan mga barangay tanod nga magbabantay ha lugar.
