TACLOBAN CITY — Nagpahimatngon ha publiko hi Dra. Gloria Fabrigas, Chief of Hospital han Tacloban City Hospital nga igpatuman an health and safety precautions samtang nabisita ha mga sementeryo agud malikayan an mga sakit ngan iba pa nga peligro ha panlawas.
Sumala kan Fabrigas, importante nga unahon an hydration ngan sun protection pinaagi han pagdara hin igo nga tubig nga pwede inumon. Samtang, ginpahinumduman liwat niya an publiko nga likayan an pag-inom hin tubig nga diri sigurado an gintikangan agud malikayan an food and waterborne infection.
May kalabotan naman ha food safety and hygiene, iya gin-aghat an publiko nga magdara hin kalugaringon nga pagkaon ngan likayan an pagdara hin mga pagkaon nga may-ada cream tungod kay madagmit ini magpan-os.
Ginpahinumdoman liwat ni Fabrigas an publiko nga magdara hin alcohol-based hand sanitizer o wet wipes para ha paglimpyo han mga kamot, ngan magdara hin face mask para ha kadugangan nga proteksyon. Importante liwat nga diri hingalimtan an pag-inom han maintenance medicines, labi na hadton may diabetes ngan hypertension, ngan magdara hin mga kinahanglanon nga medisina, first aid kit ngan mosquito repellant.
Samtang, gin-aaghat niya an ngatanan nga magin responsable ngan sumunod ha mga pahinumdom agud masigurado an katalwasan ngan malikayan an problema ha pagbisita ha mga sementeryo.
