TACLOBAN CITY — Nagdumara hin Photovoice Exhibit an University of the Philippines Tacloban nga kaparte han AHon Project nga ginsusuportaran han British Academy ngan gin-oorganisa ha pakikigbinuligay han magkadurudilain nga mga institusyon ha edukasyon, kaupod an University of Melbourne ngan UP Tacloban.
Sumala kan Sigmund Fletcher Tarrayo, faculty member han Department of Economics and Political Science han University of the Philippines Tacloban, an nasabi nga aktibidad in may tema nga “Paglaum, Pag-uswag” kun diin ginpapakita kun paunan-o ginsasabuhay han mga komunidad an resilience, paglaum ngan pag-uswag ha butnga han mga kalamidad ngan magkadurudilain nga mga ayat ha kinabuhi.
Ginpahayag ni Tarrayo nga kasagaran nga gingagamit an konsepto han resilience ha paghulagway han abilidad han mga komunidad nga makarekober tikang ha mga kalamidad ngan magkadurudilain nga mga kakurian. Pinaagi han exhibit, karuyag nira nga maipakita diri la an karuyag sidngon hini, kundi kun paunan-o ini aktuwal nga naieksperyensyahan ngan ginsasabuhay han mga tawo ha ira adlaw-adlaw nga kinabuhi.
Pinaagi han Photovoice, gintatagan hin oportunidad an mga partisipante nga igpaangbit an ira mga istorya ngan eksperyensya pinaagi han mga litrato nga ira mismo ginkuha. An mga litrato in nagseserbi liwat nga paagi ha paghinumdom han mga naglabay nga kalamidad ngan iba pa nga mga panhitabo, samtang iginpapakita an mga leksyon, paglaum ngan pag-uswag nga nahimo han mga komunidad tikang hini.
An mga litrato nga iginpapakita ha exhibit in tikang ha mga partisipante han research project ha Guiuan, Eastern Samar, ngan Tacloban City. Pinaagi han ira mga litrato ngan mga istorya, ginpapabug-atan han exhibit an importante nga papel han mga komunidad ha paghatag hin depinisyon ha resilience, pati gihapon an ira kapasidad nga magpadayon ngan umuswag bisan pa han mga kakurian nga ira naeksperyensyahan.
