Iginkabaraka ni Senator JV Ejercito an ada ha P206 bilyon nga dugang-iban han Kamara ha gin aprubahan nga P7.2 trilyon nga 2027 national budget.
Napapausa hi Ejercito nga Chairman han Senate Committee on Finance ha kadako han ginbag-uhan han 2027 National Expenditure Program ngan ha General Appropriations Bill nga iginpasa han Kamara.
Gintudlok ni Ejercito an mga nakit-an nga iban ha budget nga iginbalhin ha iba nga items.
Kaupod ha gin-ibanan an P130 bilyon nga pondo para ha foreign assisted projects kun diin nakasulod an Metro Manila Subway project ngan an North South Commuter Railway, an P9.5 bilyon nga calamity fund nga duro nga makababaraka mahitungod ha epekto han very strong El Niño, ngan an P4.5 bilyon nga budget para ha health facilities enhancement program.
Gin ibanan gihapon hin P4 bilyon an budget para ha immunization pero gindugangan naman an medical assistance program hin ₱23.9 billion, samtang ha Department of Public Works and Highways (DPWH) gin ibanan an pondo para ha right of way hin P2.6 biyon pero gindugangan naman hin P13 bilyon an construction, maintenance, rehabilitation, ngan widening projects.
May bag-o gihapon nga item nga Presidential Assistance for Fisherfolks nga gin alutagaan hin P10 bilyon ngan gindugangan gihapon hin P8 bilyon an flood mitigation structures pero ada ha P4.6 naman an igin iban ha flood mitigation projects ha sulod han mga major river basins.
Kaupod gihapon ha ginsita ni Ejercito an ginpadako nga budget han Kamara para ha mga ayuda programs sugad han Assistance to Individuals in Crisis Situations (AICS) ngan Tulong Panghanapbuhay sa Ating Disadvantaged/Displaced Workers (TUPAD) nga iginbutang naman agud pam-bulig ha mga maaapektaran han El Niño.
