Nahuman na an P10-milyon nga slope protection project ha Sitio Hawod, Barangay Balire, Barugo, Leyte, nga ginhimo agud masolusyonan an maiha na nga problema han mga residente ha nasabi nga lugar.
An proyekto in opisyal nga gin-turnover dida han Septyembre 16, nga gintambungan han magkadurudilain nga opisyal han Provincial Government of Leyte, lakip an mga board member, vice mayor, barangay captain ngan mga opisyal, mga miyembro han Sangguniang Bayan, SK chairperson, ngan ABC president.
Sumala kan Barugo Municipal Mayor Dr. Aron Balais, maiha na ini nga problema tikang han iya paglingkod ha puwesto dida han 2022, tungod kay padayon nga ginkakaon han tubig an ilarom han kalsada. Gin-aalegar nga usa ini nga quarry site, kun diin nagtitikailarum an pangpang tungod han pag-agos han tubig, labi na ha panahon han bagyo ngan pagtaob.
Ginpahayag ni Balais nga dayon ini nga gin-aksyunan han Provincial Engineering Office ha panguna ni Leyte Governor Carlos Jericho “Icot” Petilla ngan ginhatagan hira hin P10 milyon nga pondo para ha slope protection project.
Ginpatapod ni Balais nga ha pagkayana mas talwas na an Sitio Hawud tungod han nahimo nga embankment ngan slope protection nga magpupugong ha pagtimpag han pangpang ngan makakabulig ha paglikay han pagbaha ha lugar.
