Nanawagan hi ACLC College Tacloban City Dean nga hi Dr. Cesar A. Silay nga pakusgon an child protection ngan online safety ha mga eskwelahan kasunod han shooting incident ha South Cotabato, nga iya ginkikita nga kinahanglan liwat tagan hin atensyon an posible nga epekto han bayolente nga mga content ha internet ha mga kabataan.
Sumala kan Silay, posible magin usa nga factor an exposure han mga menor de edad ha bayolente nga mga video online rason agud magbuhat hin diri maupay an usa nga bata, pero kinahanglan anay masabtan an iya kahimtang ngan an mga problema nga iya gin-aagian antes maghatag hin konklusyon.
Ginpahayag ni Silay nga importante an preventive measures ha mga eskwelahan, sugad han pagpakusog han Child Protection Committee, istrikto nga pagpatuman han mga polisiya kontra bullying, ngan paghatag hin husto nga giya ha mga estudyante mahitungod han online safety. Kinahanglan, sumala ha iya, mayda klaro nga mekanismo an mga eskwelahan ha pagbulig ha mga estudyante nga nakakaeksperyensya hin mga problema ha sulod o gawas han eskwelahan.
Dugang pa ni Silay, imbes nga ipaangbit dayon ha social media an personal nga problema han usa nga bata, mas maupay nga dumaop ha guidance counselor, mga kag-anak, eskwelahan, o kwalipikado nga health professional agud mahibaruan an tinuod nga kahimtang ngan mahatagan hin angay nga suporta an bata.
Samtang, ginpabug-atan ni Silay nga kinahanglan magkaada hin positibo ngan talwas nga palibot ha eskwelahan nga makakabulig ha paghulma han maupay nga pamatasan ngan kahimtang han hunahuna han mga kabataan. Importante liwat an madig-on nga koordinasyon han eskwelahan, kag-anak ngan komunidad agud mas temprano nga makilala an mga senyales han posible nga problema o peligro ngan mapugngan an mga insidente nga posible magresulta ha mas seryoso nga kadaot.
