Subra 61,000 nga mga indibidwal an nadakop han mga otoridad mahuman igpatuman an mahugot nga implementasyon han Safer Cities Initiative nga iginlunsar ha pangunguna han Department of the Interior and Local Government (DILG) ngan Philippine National Police (PNP) tikang Abril 6 kutob Abril 11.
Basar ha datos, subra 18,900 an naitala nga mga common offenses sugad han pagiinom ha mga dalan ngan paninigarilyo ha mga pampubliko nga lugar.
Kaparte ha mao nga datos an haros 526 nga mga kaso hin pag gawas hin waray sul-ot nga bado, 586 nga tumalapas ha enhanced curfew hours, ngan 70 nga mga karaoke-related violations.
Samtang, subra 30,000 naman an naitala nga tumalapas han mga classified local ordinances sugad han loitering, public disturbance ug iba pa.
Pag eksplikar naman ni PNP Chief PGen. Jose Melencio Nartatez Jr., an resulta han mga gin himo nga operasyon in nagpapakita la hin mas pinakusog nga police visibility ngan mas mahugot nga koordinasyon ha mga lokal nga mga otoridad ha pagpapabilin han kaayusan ngan kahimyang ha kumunidad.
Samtang, manunumduman nga pira nga mga human rights group an nagpahayag han ira posisyon kanit ha programa nga gin tawag han mga ini kumo anti-poor.
Ha kaluyo hini, nanindugan an PNP ngan DILG nga an pagpapatuman han strikto nga implementasyon in diri agud tagan hin makuri nga kahimtang an publiko kundi proteharan an mga ini ha mga posible nga krimen ug himuon nga talwas an mga komunidad.
