TACLOBAN CITY – Ginpahibaro han Regional Task Force 8, End Local Communist Armed Conflict ELCAC , nga padayon an ira pagduso ngan pag-aghat han mga walhon nga grupo nga magbalik loob na an mga ine ha gobyerno.
Subay ha datos nga kapot hiton kasundaluhan tikang han 2019-2022, umabot na ha 452 nga barangay an ira nalimpyuhan nga kanit hiton CTG o Communist Terrorist Group pinaagi ine hiton community support program.
Subay naman ha ira Mobile Community support program an paghahatag hin government services ngan pagpapahuruhugot hiton territorial defense in nagtikang han 2023, kun diin mayda 120 an natagan hin serbisyo militar, 273 naman han 2024 ngan ada ha 158 yana nga tuig 2025.
Labot dinhe, sobra 791 an napatay nga mga NPA o New People’s Army ng militar, ngan maabot naman ha 1,124 han magkalain-lain nga klase hiton armas an nakuha ha mga terorista ngan sobra 620 nga mga hideouts an nabungkag hiton militar, an nasabi nga datos in tikang han Enero 1- Disyembre 31,2024.
Sumala kan Philippine Army 8th Infantry Division Joint Task Force 8- ELCAC Civil Military Operations G7 Assistant Chief of Staff, Lt. Col Joemar Buban, padayon an ira kampanya nga magkamayda hin mahimyang nga komunidad.
Dugang pa hine, waray pa may nahihireport nga terorista nga nagbalik-loob ha gobyerno nga bumalik ha pagigin terorista.
Nanawagan naman an Regional Task Force Region 8, ha mga terorista nga magbalik-loob na ine ha gobyerno para magkamayda hin mahimyang nga pagkinabuhi ngan malikayan an madugo nga sitwasyon.
