NATIONAL NEWS– Nakapagtala an Department of Health (DOH) hin 383 nga kaso hiton aksidente ha karsada tikang han Abril 13-19 yana nga tuig, nga mas hamubo hin 32% kumpara ha kaparehos nga panahon hadton 2024 nga pag-obserba ha Semana Santa.
Ha kabug-usan maabot ha 296 nga kaso in mayda kalabutan ha motorsiklo, ada naman ha 324 indibidwal an waray gumamit hin safety gear sugad hiton helmet ngan seatbelt.
Maabot naman ha 31 katawo an natudlok nga ada ha ilarom han makaharubog nga irimnon samtang nagmamaniho han ira sarakyan.
Upat katawo naman an namatay, tanan an mga ine kanit ha motorcycle accident.
Matungod dinhi, utro nga nagpahinumdom an DOH ha publiko nga dire magmaniho hin kapoy ngan hubog, dire gihapon hingalimot pagsul-ot hiton helmet o seatbelt, sumunod ha speed limit ngan road signs, ngan likayan an paggamit hiton cellphone samtang nagmamaneho.
