TACLOBAN CITY – Ginpahibaro han Department of Social Welfare and Development o DSWD region 8, nga maabot ha 37,000 nga mga kabataan ha bug-os nga rehiyon an waray makag-enroll yana nga school year 2025-2026.
Sumala kan Paula Unay, – 4Ps Program Coordinator Department of Social Welfare and Development Eastern Visayas, an Leyte an may pinakahitas nga ihap han mga kabataan nga waray interest nga umiskwela, kun diin mayda an mga ine kabug-usan nga 10,421, samtang mayda naman 7,536 an Northern samar, 3,914 Eastern samar, ngan1,720 ha Southern Leyte, ngan an kadam-an ha mga ine in miyembro han Pantawid Pamilyang Pilipino Program o 4ps.
Dugang pa ni Unay, usa ha mga rason han mga ine in sayo nga nag-asawa, ngan sugadman waray kapas an kag-anak nga suportahan an mga ine ha ira pag-aram, ngan an sayo nga pagtratrabaho han kabataan nga gintatawag nga child labor.
Ginpaangbit pa hiton DSWD, nga ira ginhihimo an ngatanan agud nga masolusyunan an nasabi nga probkema kun diin nakikipagsumpayan an ira buhatan ha mga scholarship program ngan 4ps program nga naghahatod hin bulig ha mga nagkikinahanglan.
Mababaruan nga ha sektor han edukasyon usa ine nga dako nga ayat, matungod nga dire nira kontrolado an sitwasyon han kada-pamilya, kun diin an edukasyon in dire gintatatagan hin prayoridad.
