TACLOBAN CITY – Gin aandaman na han Philippine Coast Guard an plano nga 24-oras nga biyahe tikang ha Amandayehan Port – Tacloban Port vice versa, kun diin ginhuhulat nala an mga navigational buoys tikang ha Philippine Port Authority agud matikangan na buwas nga adlaw, Myerkules an pagbutang han mga boya.
Ginlalauman naman nga maabot ha 25-30 nga mga navigational buoys an ig bubutang ha area han Amandayehan Port mahitungod nga damo an bahura nga nahihimutang ha San Pedro Bay.
Sumala kan Philippine Coast Guard Capt. Elgene JF Gregorio, an pag butang hin mga boya ha nasabi nga area in makakabulig agud magin 10-hours kada adlaw an biyahe han mga barge, sugadman magkamay-ada hin full operation nga makakabulig naman ha pagtudlok ha gin kakaatubang nga paghuruot han mga truckers nga apektado han weight restrictions han San Juanico Bridge.
Gin malatumat pa hini nga maa-akos han nasabi nga pantalan an lima ka biyahe 24-oras, pero ha pagkayana, an day time navigation in makaka-akos la hin upat ka-biyahe kada barge mahitungod nga maabot hin sobra duha ka oras an biyahe han kada-vessels tikang ha point of origin ngadto han point of destination sugad man han loading ngan unloading han mga ini.
Dungang pa hine, kun matikangan na an 24-oras nga biyahe in mag ri-relyebo an mga barge nga mabiyahe mahitungod nga usa la nga biyahe an gin tutugutan tikang Tacloban port to Amandeyehan port vice versa agud ngatanan nga mga vessels in ma akumodar.
Samtang, ‘queuing’ la gihapon an kabutangan han mga trucks ha mga highways han Samar ngan Leyte areas ilabi na an area han Samar mahitungod nga gutiay ngan haligot an lugar nga kinamumutangan han mga trucks pero ha kaluyo hini in gin sigurado ni Cpt. Gregorio nga an mga ahensya han PCG, PPA, ngan MARINA in gin bubuhat an tanan nga pitad agud malikayan an paghuruot han trapiko. (via Bombo Niña Magpili)
