TACLOBAN CITY – Maabot ha 22 nga mga police trainees ha Regional Training Center 8 ha San Jose, Tacloban City an nagpositibo ha COVID-19.
Labot la ha mao nga ihap in duha nga mga personnel ngan usa nga civilian employee gihapon han RTC an kumpirmado nga nagpositibo ha mao nga sakit.
Sumala kan PSSgt. Lalaine Rosales, tagapagyakan han Regional Training Center, nagtikang an virus ha lima nga mga trainees nga nagkaada hin sintomas ngan han igpailarom an mga ini ha swab test nagpositibo ha COVID-19 an upat ha mga ini.
Dayon naman nga nagdumara hin contact tracing ha mga nakahibalag han mga ini kun diin umabot ha 40 an ginpailarom gihapon ha swab test ngan 21 an kumpirmado nga natapnan han virus.
Nagtutuo naman an mga otoridad nga posible nga nakuha han mga trainees an mao nga virus tikang han mga ginkadtuan han mga ini san-o nga magtransfer ha RTC kahuman han ira oath taking.
Ginklaro naman ni Rosales nga an mga nagpositibo in bag-o nga batch han police trainees ngan waray an mga ini ginsalakot ha mga nanhiuna nga mga batch hin trainees.
Ginsiguro gihapon han mga ini nga waray exposure ha iba nga mga katawhan an mga nagpositibo nga police trainees tungod nga pag-ulpot nira ha RTC in dayon an mga ini nga gin-quarantine.
Ha pagkayana in suspendido la anay an tanan han mga lectures ngan training nga gindudumara ha RTC 8.
