TACLOBAN CITY – Patay an duha nga mga menor de edad mahuman nga matrap ha sakob han ira panimalay nga gintuyo pagsunog han ira la mismo tatay.
An mao nga mga biktima in nag-eedad 16 anyos ngan 13 anyos kun diin an mga ini in anak ngan umangkon la mismo han suspek nga ginkilala kan Fernando Ford Frigillana, 39 anyos ngan residente han Catarman, Northern Samar.
Sumala kan SFO2 Rubin Calumpiano han Catarman, una anay nga nangayat hin away an mao nga suspek nga kumuha pa hin pisaw tungod han epekto han makahurubog nga irimnon.
Nasaway naman ini han iya mga paryente ngan nagdesisyon nga pumahuway anay.
Han katutnga na han kagab-ihon in nakagmata an usa hini nga paryente han nagkakalayo na an ira balay.
Subay ha imbestigasyon, gasolina an gingamit han suspek ha pagsunog han ira panimalay.
Tungod nga nangangaturog an mga biktima han mahitabo an insidente, waray an mga ini makagawas para maisalbar an ira mga kalugaringon tungod nga nakapadlock tanan han mga purtahan ha ira balay.
Ha pagkayana in ada na ha kustodiya han mga kapulisan an suspek ngan padayon an imbestigasyon bahin han mao nga insidente.
Nahibaruan nga maabot ha 60 porsyente han mao nga panimalay an naugbaw tungod han mao nga sunog.
