Dakop han mga otoridad pinaagi han gindumara nga hot pursuit operation an usa nga lalaki mahuman hini ginbuno an iya kainom ha Barangay Libertad, Kananga, Leyte dida han mga nakalabay nga aldaw.
Ginkilala an biktima kan alyas “Joe”, aada ha legal nga pangidaron, waray asawa, parag-uma ngan residente han nasabi nga barangay, samtang ginkilala naman an suspek kan alyas “Lito”, 61-anyos, ngan residente gihapon han lugar.
Subay hiton impormasyon, nakakarawat hin tawag tikang ha usa nga concerned citizen an Kananga Municipal Police Station, nga mayda hini nakit-an nga duguan nga lawas ha ligid han karsada kun diin, dayon naman ini ginrespondehan han mga kapulisan.
Pag-abot ha lugar han insidente in nagdumara hin hot pursuit operation an mga otoridad agud madakop an nagpapaluyo han krimen kun diin, malinangpuson naman nira nadakop an suspek mahuman han usa ka-adlaw.
Nagawas ha imbestigasyon, nga gin-imbetaran han suspek an biktima hin irignom ha usa nga tindahan. Dida han mauli na an biktima, in gin-akbayan hiya han suspek ngan tigda nala ini ginbuno an dughan hini gamit han usa nga halaba nga pisaw nga nagin rason han dagmit nga kamatayon hini.
Nasabtan nga may pagdumot an suspek ha biktima mahitungod nga an bugto han biktima in ginpatay an tatay han suspek dida han mga nakalabay nga tuig.
Samtang, ha pagkayana in kapot na han mga kapulisan an suspek kun diin, papasakahan naman ini hin kaangayan nga kaso.
