TACLOBAN CITY — Arestado an duha nga lalaki ngan duha nga babaye ha gindumara buy-bust operation han mga otoridad ha nadismantle an usa nga drug den ha Brgy. 50-B Youngfield, Tacloban City.
Nakilala an mga suspek nga hira Micahel Montilla, (Drug Den Maintainer), 45 anyos; Criselda Tical, 40 anyos; Roberto Villano y Arante, 50 anyos ngan Alena Malinao y Villareal, 49 anyos ngan pareho mga residente han mao nga lugar.
Sumala kan Rogelette Urgel, tagapagyakan han PDEA RO8, nga dayun hira nga nagdumara hin operasyon mahuman nga makakarawat hin report bahin han padayun la gihapon nga pag-operate nga drug den.
Didto na nga nadakop an mga suspek samtang nagpopot session pa an iba
Nabaruan nga an nagkadadakop nga mga suspek in puro mga newly identified drug personality.
Napalit ngan nakompiska ha mao nga operasyon an duha ka sachet han gintutuuhan shabu nga may estimated market value nga 6,800 pesos ngan mga drug paraphernalia.
Naatubang naman an mao nga mga suspek ha kaso nga pagtalapas han Section 5, 6, 11, 12 ngan 13 han Article II han RA 9165 ngan yana in temporaryo nga nakadetine ha PDEA RO8 Detention Facility.
