TACLOBAN CITY – Patay an usa nga lalaki nga estudyante mahuman nga malumos ha kadagatan han Brgy. San Antonio, Basey Samar dida han kulop han Nobyembre 12.
Ginkilala an biktima kan alyas Cris, 18-anyos, Grade 12 student han Leyte National High School ngan residente han Palo, Leyte.
Basar han imbestigasyon han mga otoridad nga bumisita an biktima ha Basey kaupod an mga kasangkayan hini kun diin, nagkamayda hin drinking session an mga ini ugsa mahunahunaan nga mangarigo hin dagat.
Durante han pangarigo han mga ini in nagkamayda hin pagsobasko hiton hangin ngan makusog nga pag-uran rason han pagdagko han balud.
Basar pa han imbestigasyon nga nahirayo an tsinelas han biktima nga kun diin iya ini ginprobaran nga kuhaon pero mahitungod han hangin in mas kumusog an pagkiwa han dagat rason han pagkalunod hini.
Dayon naman nga rumesponde an mga otoridad mahuman nga mangaro hin bulig an mga kasangkayan hini pero nakurian na an mga rescuers pamiling pag-ulpot dida han gab-i matungod nga masirom ngan han maraot nga panahon.
Samtang dida naman han nakalabay nga adlaw, Nobyembre 14 in natad-an an lawas han biktima nga naglulutaw-lutaw ha baybayon han mao nga barangay kun diin, dayon naman ini nga gindara agud ipailarum ha autopsy.
