TACLOBAN CITY – Mahugot nga ginbabantayan ngan gin aandaman han mga residente sugadman han mga ahensya han gobyerno an pag-abot ngan pag-labay han bagyong Pepito ha Sinirangan Bisayas.
Sumala kan Civil Defense Eastern Visayas Information Officer, Sher Rysiah Saises, kumo pangandaman han nasabin nga bagyo in nagtikang na hira pagdumara hin pre-disaster meeting kun diin usa ha mga gin kasarabutan han ira ahensya in magpadara hin advanced composite team o mag deploy hin grupo ha mga maapektaran nga lugar ugsa an pag-igo han bagyo.
Dida han mga nakalabay nga adlaw, nagtikang na an ira deployment han duha nga grupo kun diin naka-base an mga ini ha Norte ngan Sinirangan Samar.
Ada naman ha 12 kabug-os nga mga personnels an sulod han usa ka-team kun diin madudugngan pa daw ini, depende kun kikinahanglanon.
Ginbubug-os ini han Office of the Civil Defense (OCD), Philippine Air Force (AFP), Department of Social Welfare and Development (DSWD), Department of Interior and Local Government (DILG), Department of Information and Communications Technology (DICT), Philippine National Police (PNP), ngan iba pa nga ahensya han gobyerno.
Kadungan han pagka-abot han mga ini ha ira area of deployment in nagdumara na gihapon an mga ini hin pre-disaster meeting ha lugar nga ira sakop.
Ha pagkayana, naka-isa naman an Red Alert ha bug-os nga rehiyon kumo pangandaman han nasabi nga bagyo.
Naka-andam na gihapon an mga grupo nga naka-deploy ha mga lugar in kaso nga kinahanglanon na an pagbakwit han mga residente ha oras nga abaton na na pag-abot ni Pepito.
Ha lain nga bahin, kakulop pala nga adlaw, Nobyembre 14, in nag pagawas na hin suspensyon ha ngatanan nga lebel han klase ha parehas pribado ngan pampubliko nga iskuylahan an probinsya han Northern Samar kuno pangandaman han bagyo.
