TACLOBAN CITY – Patay an usa nga Brgy. Kagawad ha Brgy. Casilion, Villaba, Leyte mahuman nga panigbason ine ha iya kalugaringon nga umhanan hin humay dida han nakalabay nga adlaw.
Gin kilala an biktima kan alyas Romeo, 66-anyos pangindaraon, samtang an suspek naman in hi alyas Gill, 75-anyos an pangidaron, parehas residente han nasabi nga barangay.
Sumala kan Villaba Municipal Police Station Officer-in-Charge, PMaj. Ian Salvador Po, personal nga delito mahitungod ha tuna an rason han pagtigbasa han suspek ha biktima.
Basar ha imbestigasyon, sumala hiton nakakita, banda alas-11 han nasabi nga adlaw han pumakadto an biktima ha iya hagna nga harani ha balay han suspek kun diin nakit-an hine nga an boundary o muhon nga ginbutang ha butnga han hagna han suspek ngan biktima in gin balhin.
Ginpurot han biktima an muhon agud ig balik ine ha dati nga kinamumutangan han tigda nga gumawas an suspek dara an iya sundang ngan gin panigbas an biktima.
Nakadalagan pa naman an biktima ha ngadto ha butngan han hagna hine pero ginsundan ine han suspek ngan ginpanigbas pa hin pauru-utro.
Nag-angkon naman hin damo nga tinigbasan an biktima ngan mayda daw gihapon ine binun-an.
Nahibaruan gihapon nga pirme nagkaka-debate an duha kabahin han pagtaga-tuna.
Dayun naman nga gin aresto an suspek han mga kapulisan ngan presente nga nakapaslak ha Villaba Municipal Police Station.
