TACLOBAN CITY – Ginpahibaro han City Agricultue Office nga buhi an upland rice ha syudad han Tacloban.
Ini ine napamatud-an han Office of the City Agriculturist kahuman nga makapag harvest hira han purified Kalinayan Upland Rice ha Tacloban Agricultural Crops Resources Hub (TACREH).
Sumala kan Romelo Anade, Head hiton City Agriculture Office, maupay an nagin resulta han trial o pagproyba, ngan igduduso han ira opisina nga ma-replicate o mahimo gihapon ini han mga parag-uma ha upland barangays agud nga mapabaskog an rice production ha Tacloban.
Dugang pa hiton mao nga opisyal, maghahatag an ira buhatan hin libre nga Upland rice seeds tikang han ani ha demo farm ngadto han mga upland barangay farmers nga magtatalinguha nga ma-replicate an nasabi nga production ngan mas mapadamo pa an upland rice farmers ha syudad.
Sumala pa kan Anade, nga dire na kikinahanglanon hin irigasyon tungod nga nabubuhi ngan nakakapagpatigayon an Upland rice bisan waray an nasabi nga irigasyon.
Mababaruan nga an Kalinayan Rice in usa han mga pinakamahal nga variety han bugas dinhi ha Pilipinas. Mahamot ngan nakakahatag hin maupay nga benepisyo panlawas hiton usa nga indibidwal.
