BARUGO, LEYTE – Nagin mapaso an tensyon ha butnga hiton duha nga kontra partido hiunong han pagsalawad hiton Certificate of Candidacy ha Barugo, Leyte.
Ha eksklusibo nga pakipaghimangraw han Bombo Radyo Tacloban kan Former Barugo Municipal Mayor, Macel Avestruz nga waray pasudla ngan ginsadhan an ira partido ha gawas han gate hiton Barugo LGU ha siyahan nga adlaw han pagsalawad han COC.
Dugang hini nga naghangyo naman nga pasudlon hira nga mga taga-suporta han aspirant ha sakob han gate ngan ira ginmalatumat nga iton masalawad la an masakob han opisina pero ginbaribadan lagihapon hira han tawo hiton LGU.
Samtang, sumala pa ha anay alkalde nga daw gintiming an pagsarado han gate hiton LGU dida han panahon nga masalawad na an ira aspirant han COC kun diin, nga daw klaro nga usa ini nga pag-atake ha ira partido.
Ha eksklusibo gihapon nga pakipaghimangraw han Bombo Radyo Tacloban, ginmalatumat ni Incumbent Barugo Municipal Mayor Dr. Aron Balais nga waray katungod iton munisipyo nga dire pagpasulod han may mga transaksyon o mga masalawad han ira Certificate of Candidacy, ginka-eksakto mangud nga ha mao nga adlaw in mayda liwat aktibidad nga gindudumara ha sakob han munisipyo.
Sumala hini nga ha mao nga adlaw in mayda nira ginpalusad nga kamanduan nga kun diin, nagkayamayda hira hiton paglimita ha pagpasakob han mga tawo ngan behikulo. Panuyuan mangud la nira in makontrol iton pagdamo ngan paghuruot ha sakob han municipal compound.
Gindumara mangud ha mao nga adlaw an pandestribwer han mga bulig ha mga benepisyaryo kumo kaparte han ira “Gugma Fair” nga kun diin, ginatenderan ini han maabot sobra 500 nga mga recepients.
Dugang han alkalde, nga waray hiya mag-laum nga masalalawad gihapon ha parehas nga adlaw hi Atty. En-goy Avestruz aspirant han partido ni former Barugo Mayor Marcel Avestruz.
Ginklaro naman ni Mayor Balais nga waray nira saradhi an gate han munisipyo ngan dire ini usa nga pag-atake ha kaluyo nga partido, nagbubuhat mangud la hira hin crowd-control agud nga dire magbugi-ot ha sakob han munisipyo.
