TACLOBAN CITY – Ha maabot nga Marso han presente nga tuig in titikangan na an strikto nga implementasyon han City Ordinance No. 2002-8-57 o Jaywalking Ordinance ha syudad kun diin may kaangayan nga penalidad para han magtatalapas hine.
Sumala kan Ret. PMaj. Restituto Reglos, Chief Operation hiton Traffic Operations, Management, Enforcement and Control Office (TOMECO), nagkukulang pa hira hin tawo nga magbabantay ngan manginginano ha mga karsadahan kaparte han mga magtatalabok ha dire angay nga tarabukan.
Ginpahayag gihapon hine nga plano nira nga mag-tap ha mga barangay services kun pwede an mga ine makabulig pagbantay bisan haira mga lugar la mahitungod nga dire akos han TOMECO nga masakop an ngatanan nga parte han syudad labi na an downtown area.
Para naman han magigin sweldo han mga magbabantay in mahatag an mga ine hin insentibo nga matikang ha matitirok nga penalidad tikang ha madadakop nga magtatalapas han ordinansa.
Ada manggud ha P200 an penalidad para ha first offense, P300 ha second offense, ngan P500 o pagkapreso hin lima ngada ha napulo ka-adlaw naman para ha third offense.
Magigin epektibo an nasabi nga ordinansa pagtamak hiton syahan nga adlaw han Marso 2024.
