TACLOBAN CITY – Gintikangan na dida han nakalabay nga semana an inisyal nga pagpa-awas hin tubig ha mga umahan.
Sumala kan Confederation of Irrigators Association Regional President, Ret. PLt. Col. Adolfo Olaya, an gindumara nga pagpa-awas in para ha mga regular nga parag-uma nga dire membro han contract farming, ngan ine na an ikaduha beses mahitungod nga dida han mga nakalabay na nga semana han Nobyembre in gintikangan daw an pagpa-awas ha mga umahan nga para naman ha mga membro han contract farming.
Ha pagkayana, ada naman ha land break status an mga membro han contract farming kun diin dida han nakalabay nga semana in kumuha na gihapon an mga ine han ira gahi tikang ha National Irrigation Administration.
Samtang, gin atras naman an cropping season kun diin an nakatalaan nga pananom dapat dida pa hiton Enero pero mahitungod nga mayda contract farming, in kinahanglan nga makatanom an mga ine yana nga Disyembre, sanglit an third crop in mahihingangadto ha contract farming.
Maadjust gihapon an regular nga pananom nga duha kabeses ha usa katuig, kun diin kun makatanom ngani yana nga Disyembre karuyag sidngon, babari-on ine ha Marso, ngan mayda la gutiay nga panahon nga igbubutang ngan magtatanom na utro para pag-abot han mga banda-Agosto in magbabari na utro, amu an gintatawag nga second dry crop. Ngan an third crop in igkakadto na ha contract farming.
