TACLOBAN CITY – Nagpapadayon an ginbubuhat nga Road Clearing Operations ha kakarsadahan han Tacloban City agud masiguro iton talwas nga karsada ha mga motorista ngan molupyo.
Sumala kan TOMECO Enforcement and Operation Division Chief, Jobz Lagutan, nga an panuyuan hini nga operasyon in agud mahawanan an kakarsadahan, mga eskinita, ngan sidewalk ha mga nakakabalabag ngan mga ilegal nga iginpantukod agud mas magin maupay iton pag-agi ngan dire maghuruot nga rason han pagbug-at hiton trapiko ngan sugadman para han seguridad han publiko.
Dugang pa hini nga magpapadayon ini nga operasyon ha bug-os nga lugar han siyudad basar na gihapon ha aludayday han DILG Memorandum Circular Nos. 2020-085, 2023-017, ngan 2024-053.
Nagpapaluyo naman hini nga inisyatiba in an Road Clearing Joint Task Force kun diin, ini nga multi-agency team in ginkaurupdan han City Mayor’s Office, City Administrator’s Office, Business Permit and Licensing Division, City Engineer’s Office, TOMECO, City Planning and Development Office, City Legal Office, City Health Office, City Treasurer’s Office, ngan Tacloban City Police Office ha direktiba han Executive Order No. 2024-10-071 nga ginpirmahan naman ni Tacloban Mayor Alfred Romualdez.
Manunumduman nga dida han mga nakalabay nga adlaw in nagbuhat hin clearing operation kun diin, ginhawanan an area atubangan han Eastern Visayas Medical Center an mga tindahan nga natalapas han memorandum kun diin, nag-isyu gihapon an BPLD ha mga tag-iya han tindahan nga nag-ooperate hin waray business permit ngan mga kaangayan nga dokumento.
