TACLOBAN CITY– Ginpahibaro hiton DepEd City Division, nga nagtikang na hira mangrawat hiton mga inisyal nga impormasyon para ha incoming Kindergarten, Grade 1,7 ngan 11, kalakip na gihapon dinhi an mga balik-aral, ngan ALS nga mga estudyante.
Sumala kan Tacloban DepEd City Division, Information Officer, Dr. Nilo Eder, nga an panuyo han ira ginhihimo, in agud nga mahibaruan nira an ihap han mga bag-o nga estudyante para hiton S.Y. 2025-2026.
Ginklaro ni Eder, nga an nasabi nga pangarawat han ira buhatan, in dire pa enrollment, kundi para han ira hihimuon nga record, kun anu iton mga posible nga igdugang nga materiales nga gagamiton hiton usa nga estudyante.
Gintagan duon hine nga importante an ira ginhihimo, agud nga ma-asisteran nira an posible nga magin problema, ngan dayon ine masolusyunan.
Dugang pa hine, nga an pagkakamayda hin sayo nga record hiton mga estudyante ugsa an enrollment period, in importante agud nga mahibaruan gihapon kun an usa nga eskwelahan in akos pa mag-akomodar hiton mga kabataan.
