TACLOBAN CITY – Padayon nga gin-aaghat han Tacloban City Health Office, an mga residente hitun syudad nga magpabakuna ha booster shot tungod nga habubo la gihapon iton vaccination rate agud malikayan an paghitaas hiton kaso han Covid-19.
Sumala kan Dr. Danilo Ecarma, Head Tacloban City Health Office, padayun an pambakuna ha syudad hitun Tacloban kun diin gintatawag ine yana nga “Pinas-lakas” nga priority adton booster doses.
Subay haiya, ha 50% nga target population hitun syudad aada pala ha 19% an mga nabakunahan hin booster samtang 100% naman an nakakarawat han primary series han bakuna.
Ginmalatumat naman hine nga damo pa na mga tawo an dire natuod nga epektibo an panbakuna kontra han mao nga virus ngan may-ada mga side effects rason nga habubo pa iton coverage rate hiton booster doses.
Gintagan naman hin duon han mao nga opisyal nga talwas ngan epektibo an booster shot vaccines.
Kinahanglan daw liwat hin booster dose an usa nga indibidwal mahitungod nga nagtitikahamubo na an pagigin epektibo han bakuna kun nag-iiha na ine ha lawas hiton usa nga indibidwal.
