TACLOBAN CITY – Ginklaro han Tacloban City Health Office nga waray nahitatabo nga community transmission han COVID-19 ha syudad.
Ini in mahitungod han kabaraka han publiko bahin han naidudugang nga mga kaso han COVID-19 ha Tacloban han naglabay nga mga adlaw.
Sumala kan Dra. Gloria Fabrigas, head han Tacloban City Health Office, ha pagkayana in mayda upat nga active cases han COVID-19 ha syudad ngan an mga ini in local transmission ngan dire community transmission.
Ginklaro han mao nga opisyal nga maikokonsidera la an mao nga mga kaso nga lokal nga transmisyon tungod nga nati-trace man nira kun diin o patiunan-o natapnan an mao nga mga pasyente han mao nga sakit tungod nga waray an mga ini travel history ha iba nga lugar nga may kaso han COVID-19.
Ginpahayag gihapon han mao nga opisyal nga regulated an ira pagpapatuman han mga lockdown ngan dre bug-os nga barangay an ira ginpapailarom ha pagpapasara.
Nahibaruan nga maabot ha 24 ngada 48 kaoras an pagpatuman han lockdown ha lugar kun diin tikang an nagpositibo nga pasyente agud nga matagan hin iwag an pagdumara hin contact tracing ha mga nakahibalag hini.
