TACLOBAN CITY — Boluntaryo na nga sumurinder an suspek ha pagpatay han duha nga mga menor de-edad samtang nangunguha an mga ini hin duma kaupod an usa pa nga 9 anyos nga babaye ha umhanan harani ha ira gin-uukyan ha Brgy. Pinamitinan, Marabut Samar.
Kinilala an suspek kan Michael Ferreras, 28 anyos, parag-uma ngan nag-uukoy mismo ha nasabi nga barangay.
Sumala kan PLt. Vincent Wendell Marteja, Chief of Police han Marabut Munisipal Police Station, gin-amin mismo han suspek an iya nabuhat nga krimen kun diin ginpahayag hini nga waray hiya sumabot ha iya ginbuhat ha mga biktima.
Dugang pa han suspek, nga naghahawan la ngadaw hiya ha nasabi nga bukid kun diin nahikalasan nala ini nga nakahigda na ngan nakarigo ha kalugaringon dugo an duha nga mga menor de-edad.
Han pagkita naman daw niya ha sundang nga iya kapot in dayon hiya kumalagiw ha iba nga direksyon ngan didto na tumago.
Subay pa ha statement han suspek ha mga kapulisan nga waray hiya ha sakto nga panhuna-huna ha mao nga adlaw sanglit deri hiya maaram kun kay ano nabuhat niya an mao nga krimen.
Ha pagkayana in aada na ha kustudiya han mga kapulisan an suspek samtang naghuhulat hin kaso nga igsasalawad kontra ha iya ngan padayon pa gihapon ini gin-iimbestigaran matungod deri daw matuod-tuod an iya mga statement bahin nasabi nga insidente.
Samtang, naghuhulat pa gihapon an mga otoridad ha magiging resulta han otopsiya ha 12 anyos nga babaye kun mayda ba ini involve nga sekswal nga pan-abuso.
