Gin pahayag ni Senate President Vicente “Tito” Sotto III nga iya hahangyuon kan Presidente Ferdinand Marcos Jr. nga ig-certify kumo urgent an Senate Bill 1215 o an panukala nga balaod para ha Independent People’s Commission (IPC) agud mapadagmit an pag-apruba hine.
Sumla kan Sotto, panuyo han bill nga himuon nga permanente nga balaod an nagpapadayon nga executive order han Presidente nga nagbug-os han IPC.
Gin klaro pa han senador nga dire la proyekto han Department of Public Works and Highways (DPWH) an papanginanuon han IPC, kundi pati na gihapon an mga programa han iba pa nga ahensya sugad han Department of Agriculture, Department of Health, Department of Education, ngan iba pa.
Mababaruan nga nakasurat ha panukala nga magkakamay-ada an IPC hin haluag nga imbestigasyon ha ngatanan han nahipatik nga anomalya sugad han korapsyon, ghost projects, overpricing, ngan paggamit han dire de-kalidad nga materyales ha mga proyekto han national government, local government units, ngan mga government-owned corporations.
Tatagan gihapon an IPC hin kapas nga tudlukon an mga dabi tikang ha pampubliko o pribado nga sektor, ngan magrekomenda hin mga kaso nga kriminal, sibil o administratibo kontra ha mapapatud-an nga mayda sala.
