TACLOBAN CITY– Patay an usa nga High Valued Individual mahuman an gindumara nga drug buy bust operation han mga otoridad ha Brgy. Tambulilid, Ormoc City.
Ginkilala an suspek kan Allan Bulahan alyas Tigbas, ada insakto nga pangidaron, ngan residente han Brgy. Linao, Ormoc City.
Sumala kan PLt. Rizal Antonio Leung, Officer-in-Charge han Community Affairs and Development Unit han Ormoc City Police Office, maiha na nira nga gin oobserbaran an nasabi nga suspek ngan han makakuha an mga ine hin tyempo in dayun hira nga nagdumara hin buy bust operation.
Syahan hine in nagbalyuay anay hin kontrabando an suspek ngan poser buyer kun diin nagpalit an poser buyer hin upat ka sachet hin gin aalegar nga shabu nga may timbang nga maabot ha 1.5 kgs ngan mayda estimated market value nga P10,200,000.
Mahuman an balyuay in nag-senyas an poser buyer ha mga kapulisan kun diin dayun naman an mga ine nga dumaop pero ugsa paman ine nga makadaop in tigda nga bumunot hin pusil an suspek ngan nagpabuto ine ha mga kapulisan.
Dayun naman nga dumepensa an mga kapulisan kun diin nagkabalyuay hin buto hin pusil an mga ine rason para mag-angkon hin pinusilan ha magkaduru-dilain nga parte han iya lawas an suspek.
Dayun naman ine nga gindara ha pinakaharani nga hospital pero gindeklara nga dead on arrival.
