Pira nga persons deprived of liberty (PDLs) ha Female Dormitory han Tacloban City Jail an benepisyaryo han Tulong Panghanapbuhay sa Ating Disadvantaged/Displaced Workers (TUPAD) program han Department of Labor and Employment (DOLE), nga naghahatag ha ira hin oportunidad nga makatrabaho ngan makasuporta ha ira pamilya.
Sumala kan SJO4 Judit Balanay, acting jail warden han Female Dormitory Tacloban City Jail, nagpapasalamat hira ha DOLE tungod han paghatag hin higayon ha mga PDL nga magin kaparte ha nasabi nga programa. Ha 32 nga orihinal nga benepisyaryo, 31 na la an magtatrabaho ha sulod han pasilidad tungod kay nakagawas na an usa nga PDL ngan ha ira balay na la niya bubuhaton an iya trabaho.
Lakip han mga trabaho an pagpintura han mga pasilidad, mini gardening, paglimpyo han palibot ngan pag-declogging han mga kanal. Gindibisyon naman an ira mga buruhaton ha sulod han 15 ka adlaw, kun diin ha sulod la han pasilidad han city jail hira magtatrabaho.
Makakakarawat an kada benepisyaryo hin 470 pesos kada adlaw, kun diin 7,050 pesos an kabug-usan nira nga makakarawat. Sumala kan Balanay, puwede ighatag han mga PDL an ira kita ha ira mga pamilya o idiposito ha Perpetual Help Community Cooperative (PHCCI), kun diin may mga account na an mga PDL nga miyembro hini. Samtang, an mga opisyal han city jail in puwede kumadto ha PHCCI, o an mga representante han kooperatiba mismo an makadto ha pasilidad, agud mapadali an transaksyon.
Sumala kan Balanay, tubtob 1,000 pesos la kada semana an gintutugotan nga magamit han mga PDL ha sulod han pasilidad, ngan diri ini iginhahatag nga cash kundi pinaagi hin coupon nga ira magagamit ha pagpalit han mga kinahanglanon. Samtang, naglalaum naman hira nga maaprubaran han DSWD an hira hangyo nga livelihood program nga dugang nga makakabulig ha mga Persons Deprived of Liberty o PDL.
