TACLOBAN CITY – Maabot na ha 5,000 nga mga residente ha probinsya han Northern Samar an iginbakwit mahitungod han waray hunong nga uran ngan makusog nga hangin nga durot han Bagyong Tisoy.
Sumala kan Rei Josiah Echano, head han Provincial Disaster Risk Reduction Management Office (PDRRMO) Northern Samar, dayon nira nga ginpakwit an mao nga mga residente labi na an mga nag-uukoy harani ha mga sapa ngan kadagatan ngan sugadman an mga flood ngan landslide prone areas ha ira probinsya.
Nakapreposition na gihapon an mga relief goods nga ighahatag ha mga maapektaran nga pamilya ha kada bungto han Northern Samar.
Samtang, nadugngan na an ihap han mga stranded ha Allent port nga umabot na ha sobra 2,000 nga mga pasaheros ngan sobra 300 naman an apektado nga cargo vessel nga waray na tuguti nga magbiyahe.
Nanawagan na gihapon an PDRRMO Northern Samar ha Land Transportation Office (LTO) nga dire na tugutan nga magbiyahe an mga pampasaheros nga sarakyan pakadto ha Allen ngan San Isidro Northern Samar agud nga dire na madugngan pa an ihap han mga stranded nga pasaheros.
Nahibaruan nga nagkaada na gihapon hin mga power interruption ha pira nga lugar ha mao nga probinsya.
