Aada ha P15.40 kada kilowatt-hour an effective residential power rate han Samar Electric Cooperative I o SAMELCO I yana nga Setyembre, mas hamubo kumpara han syahan nga gin-anunsyo nga posible umabot ha P26 kada kilowatt-hour.
Sumala kan Atty. Edson Picson, General Manager han SAMELCO I, an P15.40 kada kilowatt-hour nga effective rate in mas hitaas kumpara P12.80 kada kilowatt-hour nga residential rate dida han Agosto.
Ginklaro ni Picson nga an aktuwal nga rate in mas hamubo ha una nga projection nga P26 kada kilowatt-hour tungod han installment arrangement ha pagkolekta han mga baraydan han consumers kun diin gintunga ha upat kabulan an ira billing han Agosto tikang ha Independent Electricity Market Operator of the Philippines o IEMOP, pati an mga balanse nga baraydan tikang han Hunyo ngan Hulyo.
Samtang, ginpahayag pa ni Picson nga diri la an presyo han kuryente an posible nga rason han pag-umento han kabaraydan han mga consumers. Mayda liwat epekto an pag-umento han paggamit hin kuryente tungod han mapaso nga panahon, nga posible nagresulta hin mas dako nga konsumo han elektrisidad han mga panimalay.
Gin-aaghat ni Picson an mga consumers nga magin responsable ha paggamit han kuryente, labi na ha panahon han katsirak, agud makontrol an ira konsumo ngan kabaraydan.
