TACLOBAN CITY – Damo nga parag-uma ha sinirangan Bisayas an burado na an utang ha tuna mahitungod ha gindumara nga panhatag han Department of Agrarian Reform han Certificate of Condonation with Release of Mortgage (COCROM) ha mga Agrarian Reform Beneficiaries (ARBs) hini.
Maabot ha sobra 13,767 nga kwalipikado nga parag-uma an nakakarawat han CoCRoMs ha rehiyon.
Tikang ha magkadiru-dilain nga parte han Eatern Visayas an nakakarawat hin bulig sugad ha Leyte, Biliran, Southern Leyte, Eastern, Western, ngan Northern Samar.
Umabot naman hin sobra 16,076 ektarya hin tuna nga may-ada 14,838 nga sertipiko hin condonation an iginhatag han DAR ha mga parag-uma.
Dako naman an pasasalamat han mga parag-uma sugad kan Rodolfo Regis nga mayda P659,000 nga utang ha tuna nga iya gin uumhan an nabaydan mahitungod ha bulig han DAR.
Sumala kan Department of Agrarian Reform Field Operations Undersecretary Atty. Kazel C. Celeste, maabot ha sobra P604 million an nabayaran han DAR ngan gin sigurado han ira ahensya nga waray na utang nga babaydan an mga benepisyaryo nga parag-uma.
An nasabi nga bulig tikang ha direkta ni Presidente Ferdinand Marcos Jr. nga buligan an mga parag-uma nga Pilipino.
Nanawagan naman an mga parag-uma ha gobyerno nga dire umundang ha pagbulig mahitungod nga kadam-an ha ira in nagkukuri pa nga paursahon an ira pag-uma.
