TACLOBAN CITY – Gintatambal ha pagkayana an usa nga lalaki nga ginpusil han duha nga miyembro han Armed forces of the Philippines (AFP) ha Sitio Bugho, Barangay Dampigan,Sta.Rita, Samar.
Ginkilala an biktima nga hi Antonio Ramos, 23 anyos an pangidaron, residente han Sitio Liko-liko, Barangay Dampigan, Sta.Rita, Samar.
Samtang ginkilala naman an suspek nga hira Private first class Glenthel Bello ngan Pfc Gerald Bello pareho mga naka destino ha 8th Infantry Division.
Subay ha inisyal nga report han Sta Rita MPS, nga nakada ha sayawan an biktima han pusilon ini han duha nga mga sundalo gamit an .45 pistola han pusil.
Gindara naman ha Eastern Visayas Regional Medical Center (EVRMC) an biktima ngan padayun gintatambal tungod han naangkon nga samad ha iya banda kamot.
Dayun naman nga nagresponde an mga Kapulisan asya nga dayun nga nadakop hi Pfc Glenthel pero padayun nga ginbibiling hi Pfc Gerald.
Ginbabaruan pa ha pagkayana han mga kapulisan kun ano an nagin hinungdan o motibo han mao nga panmumusil.
