TACLOBAN CITY – Padayon an ginbubuhat nga imbestigasyon han mga kapulisan ha nahitabo nga shooting incident ha Brgy. Libertad, Palo Leyte nga nagresulta hin upat katawo nga patay kalakip na an duha nga retired police officers.
Sumala kan Pol. Maj. Joselito Villas, han Provincial Investigation Detective and Management Unit han Leyte Police Provincial Office (LPPO), ira gin-iimbestigaran kun patiunan-o nga nagkaurupod an mao nga mga biktima sakay han white ford ranger han retired police nga hi Constantino Torre.
Subay gihapon ha ira inisyal nga imbestigasyon, nahibaruan nga an duha nga biktima in dabi ha illegal nga droga kun diin hi Marites Pami in una na nga nadakop han naglabay nga mga tuig samtang hi Ian Pat naman in usa nga high value individual (HVI) ha provincial level nga maiha na nga ginmomonitor han mga otoridad.
Padayon gihapon an imbestigasyon han mga kapulisan agud nga matudlok an tag-iya han mga behikulo nga ginsakyan han mga suspek han mao nga panmumusil.
Gintutuuhan nga tulo an ginamit nga sarakyan han mga suspek kun diin usa hini an bumalabag ha sarakyan han mga biktima, usa an pumwesto ha sapit hini ngan usa naman an nakadto ha luyo han mga biktima.
Samtang mababaruan nga kaupod ha mga namatay nga mga retired police in hira Constantino Torre ngan Dennis Monteza.
