TACLOBAN CITY – Mahugot nga ginkondena ni Samar 1st District Representative Edgar Mary Sarmiento an natabo nga pan-aambush ha parte han Calbayog City ha Samar, duha kasemana san-o an nakatalaan nga May 9, 2022 local and national elections.
Una hini, tulo ha unom nga mga indibidwal an dead on the spot mahuman an mga ini nga pauranan hin bala han mga maabot ha 13 nga mga suspek ha Brgy. San Jose han mao nga syudad.
Basar ha imbestigasyon, sakay an mao nga mga biktima ha usa nga habal-habal o motorsiklo han pagpamumusilon an mga ini han mga suspek gamit an short ngan long firearms.
Han matumba an ira ginsasakyan nga motor, gindaop ini han mga suspek ngan ginpanmumusil pa an driver ngan ginkuha an itom nga bag han usa ha mga biktima ngan dayon nga nan-eskapo.
Nakatalwas naman an tulo nga iba pa nga mga biktima mahuman an mao nga insidente ngan yana in natudlok han mga ini pangilal-an han pira ha mga suspek.
Sumala kan Cong. Sarmiento, iya ginkokondena an mao nga panhitabo ngan naglalaum ini nga masosolbar o matutudlok han mga kapulisan an nagpapaluyo hini nga mga armado nga grupo.
Ha pagkayana in padayon pa an imbestigasyon han mga kapulisan kun may kalabutan ha pulitika an mao nga insidente kun diin usa ha mga biktima nga namatay an driver nga hi Mart Centino, anak han kapitan han Brgy. San Antonio, Calbayog ngan secretary gihapon ha mao nga barangy.
Ginkilala naman an duha nga iba pa nga namatay nga mga biktima nga hira Gelma Wahingon, 22 anyos ngan Nilda De Pedro, 48 anyos ngan parehos mga residente han Brgy. Camperito, Sta. Margarita, Samar.
