Patay an usa lalaki mahuman ini makuryente ha Sitio Cansaliksik, Poblacion 6, Paranas, Samar dida han mga nakalabay nga adlaw samtang nananggot ini hin lubi.
Ginkilala an biktima kan alyas “Jepoy”, 36-anyos an pangidaron ngan residente han Barangay 5, Paranas, Samar.
Basar han impormasyon, nananggot an biktima hin lubi nga kuprason gamit an usa nga kawayan nga may kahet.
Sumala pa ha impormasyon, nag-alang an biktima sumaklang mahitungod ha live wire han SAMELCO II nga harani han lubi sanglit gumamit ini hin dukdok kun diin, durante han panguha hini hin lubi, in aksidente nga dumikit an kawayan ha nasabi nga live wire nga nagresulta han pagkakuryente han biktima.
Dayon naman nga umaro hin bulig an mga residente pero waray dayon mayda nakaresponde nga pulis o rescue team tikang ha baryo kun diin, nagburublig nala an mga residente nga dad-on an biktima ha kahirani nga Rural Health Unit agud matagan hin kaangayan nga atensyon medikal.
Gindeklara naman nga dead on arrival an biktima han attending physician hini.
Ha lain naman nga bahin, naghahangyo an mga residente han Sitio Cansaliksik nga upayon an karsada han lugar agud mapadagmit an pagresponde han mga otoridad labi na kun mayda mga emergency.
