TACLOBAN CITY– Nakatalaan nga pagdumaraon ha Disyembre 16 yana nga bulan an anunsyo han mga nagdaog para han Christmas Parol Competition, nga gindumara han Disyembre 3, hiton Tacloban City Police Office (TCPO).
Sumala kan PLt. Ronabeth De Paz So, Information Officer, Tacloban City Police Office, kalakip gihapon nga ig-aanunsyo ha nasabi nga petsa an Office Decoration Competition, han kada departamento han ira buhatan.
Ha pagkayana, mayda na hira datos han mga nagdaog pero ha Disyembre 16 pa ine ig-aanunsyo, kadungan han ira pagdudumaraon nga Christmas Party han ira opisina.
Mababaruan nga an ngatanan nga materyales in tikang ha recycled materials kun diin makikti-an iton creativity han kada grupo.
Nagpahinumdom naman an nasabi nga opisyal ha publiko, nga ha kaluyo han pagdudumaraon nga selebrasyon yana nga kapaskuhan ngan pagtapo han bag-o nga tuig, nga siguraduhon an katalwasan han kada pamilya.
