HEALTH NEWS – An pag-uul-ol han magkaluyo nga suso in kasagaran nga nahitatabo ha mga kababayin-an, labi na kun usa kasemana san-o an menstruation.
![](https://img.bomboradyo.com/tacloban/2020/10/woman-with-breast-pain.jpg)
An mao nga pagbabag-o in sintomas han premenstrual syndrome.
Pero an pag-uul-ol han suso in pwede gihapon nga mahitungod han sobra kabug-at nga ehersisyo o nabubug-os nga cyst o bukol.
Kun magkaada hin pamumula han suso nga may kaupod nga hiranat, posible nga maging senyales ini hin impeksyon ha suso o mastitis.
An mao nga impeksyon in kasagaran ha usa la nga parte han suso. An mastitis in kasagaran gihapon nga nakakaapekto ha mga babaye ngan nanay nga nagpapasuso.
Para maibanan an pagsakit han suso sunda la an mga masunod:
1. Gumamit han hot or cold compress ha iyo suso.
2. Magsul-ot hin bra nga sakto an sukol para pansuporta nga mas maupay an dekalidad nga klase hin bra.
3. Mag-relax. Makakabulig an pagrelax para makontrol an sobra nga kabaraka kadungan an sobra nga pagsakit han suso.
4. Ibanan o likayan an pag-inom hin kape. Sumala ha Mayo clinic, bisan man kun dire pa napapamatud-an nga an pag-inom hini in nakakaapekto ha pag-ul-ol han dughan ngan iba pa nga pre menstrual symptoms, mas makakaupay kun ini in iibanan o ig uundang.
5. Ibanan an kadamo han pagkonsumo han mamantika nga mga pagkaon. Posible nga makaapekto ini ha pagkakaada hin bukol ha suso.
Dire gud masukot nga maging senyales han breast cancer kun an pag-ul-ol la han suso an imo naaabat. Pero kun mayda dire maisplikar nga pagsasakit han suso ngan nag-iha hin sobra usa kasemana, posible nga ini in usa na nga senyales han breast cancer o kadelikaduhan haimo kinabuhi sanglit kinhanglan nga magpakonsulta dayon ha doktor labi na kun may bukol nga imo nakakapa ngan may pagbabag-o ha pustura han imo suso.