TACLOBAN CITY – Nagpapabilin nga normal ngan stable an presyo han mga panguna nga papliton ha Sinirangan Bisayas ha kaluyo han pagpatuman han Tax Reform for Acceleration and Inclusion (TRAIN) Law.
Ini in naging pamahayag hiton Department of Trade and Industry (DTI) Regional Office 8.
Sumala kan Cynthia Nierras, DTI 8 Regional Director, waray magkaada hin pagkiwa o paghitaas hin presyo han mga basic commodities ha rehiyon han tikang pa han nakalabay nga bulan han Enero.
Padayon gihapon daw an ginbubuhat nga monitoring han DTI ha presyo han mga papliton ha pira nga mga panguna nga malls ngan shops nga namumutang ha mga syudad ngan bungto agud nga masiguro nga magiging nominal la an ira igpapatuman nga increase ha presyo ngan masunod ha suggested retail price.
Mahibabaruan nga pira ha mga ginmonitor nga mga produkto han DTI amo an delata nga sardinas, processed milk, kape, sabon, tinapay, noodles, mga nagpakalata nga produkto sugad han luncheon meat, meat loaf, corned beef ngan pati na gihapon an mga semento.
