TACLOBAN CITY – Ginpahayag han Philippine Coconut Authority (PCA) Regional Office 8 nga humabubo ha pagkayana an presyo han lugit o kopra ha rehiyon.
Sumala kan Joel Pilapil, Regional Manager han PCA Eastern Visayas, maabot ha 5-10% la an gin-ubos han presyo han lugit ha pagkayana kumpara han naglabay nga semana pero ini in maikokonsidera nga hitaas la gihapon nga presyo ha merkado.
An paghabubo han presyo han kopra in posible nga mahitungod ha kakulangan hin demand.
Ha kaluyo hini, in ginsisiguro naman PCA nga waray problema ha suplay han kopra ha rehiyon tungod nga padayon an pagrekober han produksyon hini ha mga lugar o probinsya nga naapektaran han naglabay nga mga bagyo.
Partikular na hini an Southern Leyte nga duro nga nadarahigan han bagyong Odette kun diin damo nga mga lubi an nagkatutumba pero ha pagkayana in padayon an clearing operation ngan ginlalauman nga ha masunod nga duha ngada lima kabulan in makakagtikang na utro ha pagtanom an mga parag-uma hin lubi ha mao nga probinsya.
